Theranda bëhet me festival mbarëkombëtar të teatrit

Muaji i ardhshëm, shkurti, do të sjellë edhe një festival të ri mbarëkombëtar të teatrit. Fjala është për festivalin mbarëkombëtar të teatrit ”Kosovafest”,  i cili do të organizohet në qytetin e Therandës në përkujdesjen e “Belvedereart” dhe kryetarit të Komunës së Therandës. Edicioni i parë i festivalit mbarëkombëtar të teatrit ”Kosovafest 2010”  do të mbahet prej 11 deri më 17 shkurt 2010 në Therandë. Lajmi është bërë i ditur nga krijuesi Reshat Sahitaj, cili është edhe pjesë e Këshillit Organizativ të festivalit. Gjatë shtatë ditëve, sa pritet të zgjasë festivali, do të shfaqen 7 shfaqje të teatrove profesioniste nga Kosova, Shqipëria, Mali i Zi dhe Maqedonia. Në një prononcim për “Kosova Sot”, Sahitaj ka thënë se tani organizatorët janë në proces të seleksionimit të shfaqjeve, të cilat do të prezantohen në këtë festival.
“Ne presim një prezantim dinjitoz të teatrit shqiptar, ndërsa gjatë këtyre shtatë ditëve do të prezantohen shtatë shfaqje nga trevat gjithëshqiptare”, ka thënë krijuesi Reshat Sahitaj. 
Po, sipas tij, organizatorët kanë paraparë ndarjen e një sërë çmimeve të shumta, ndër to edhe çmimin “Ukë Bytyçi”, në nderim të ish-kryetarit të parë të pasluftës të Therandës, pastaj  çmimin  “Besim Ndrecaj”.
Ai ka shtuar se shfaqja me e mirë do të prezantohet në Belgjikë.
Juria përzgjedhëse e festivalit, përveç vendorëve, në përbërje të saj do të ketë edhe ndërkombëtarë.
Sahitaj ka përmendur  Filip Preux, shef i departamentit për audiovizual në Ministrinë e Kulturës nga Belgjika dhe Daniel Leuveurs , akademik, dramaturg dhe profesor nga Franca. Një ndihmesë të madhe në organizim të “Kosovafest 2010”, Therandë do të japë edhe  teatri “Dodona”, ndërsa në hapje më 11 shkurt pritet të marrin pjesë personalitet të shquara të kulturës sonë.
I. V.

Publiko kete artikull: