Papunësia alarmon institucionet

Numri i të papunëve në komunën e Therandës është shumë i madh. Të dhënat flasin për mbi 87.000 banorë, prej të cilëve janë marrëdhënie pune në të dy sektorët vetëm 4213 persona. Shprehur në përqindje, vetëm rreth 5 për qind e popullatës së kësaj komune është e punësuar.
Numri i të punësuarve në sektorin publik në arsim, shëndetësi, administratën komunale, gjykatë etj, ka mbetur i njëjtë që nga paslufta, për shkak të kufizimeve buxhetore. Sipas të dhënave, shihet se numri i të punësuarve në sektorin privat ka shënuar rënie në krahasim me vitet 2002-2004, si pasojë e afarizmit jo të mirë të ndërmarrjeve të vogla dhe të mesme, që bazuar në të dhënat e vitit 2002, në sektorin privat ishin të punësuar mbi tri mijë persona.

Në shtimin e numrit të madh të të papunëve ka ndikuar edhe privatizimi i ndërmarrjeve shoqërore që ka degjeneruar vetëm papunësi. Aktualisht, në Zyrën e punësimit në Therandë janë të evidentuar mbi 15 mijë persona të papunë, por kjo shifër nuk është reale dhe konsiderohet si numri i të papunëve në këtë komunë është mbi 30 mijë. Përgjegjësi i Zyrës së punësimit, Nexhat Gashi, tha se në komunën e Therandës papunësia është bërë sfidë e papërballueshme dhe kambanë e alarmit për institucionet.

Për shkak të papunësisë së madhe, shumë të rinj hulumtojnë shansin më të vogël për të emigruar jashtë atdheut, në Perëndim. Zyra komunale e punësimit në vazhdimësi përcjell zhvillimet në tregun e punës, me qëllim të ndërmjetësimit të punëkërkuesve. ‘’Vitin e kaluar, me ndërmjetësimin e Zyrës, janë punësuar 424 persona, kurse gjatë muajit janar të këtij viti 29 punëkërkues. Do të jemi në shërbimin sa më të mirë të mundshëm të punëkërkuesve’’, tha Gashi.
/Kosova Sot/Rr. REXHAJ

Publiko kete artikull: