Rruga Therandë-Studençan nuk ndërtohet këtë vit!

Rruga  Therandë – Studençan që kalon përmes fshatit Reshtan dhe që e lidh Therandën me dy komunat fqinje, Mamushën dhe Rahovecin që njëmbëdhjetë vjet pas luftës ka mbetur  aksi më i shkatërruar rrugor, mbase në tërë Kosovën. Kjo rrugë, me qendrën komunale i lidh mbi 20 mijë banorë të fshatrave Studençan, Samadraxhë, Nëpërbisht, Dobërdelan, Semetisht, Nishor, Kasterc dhe Peçan të Vogël. Banorët e këtyre fshatrave për çdo ditë janë të shtrënguar ta përshkojnë këtë rrugë, pothuaj të pakalueshme, që u sjell shumë telashe, e jo rrallë edhe amortizim të automjeteve. Ish-pushteti lokal që për nëntë vjet është udhëhequr nga LDK-ja, mosndërtimin e rrugës e ka arsyetuar me faktin se ajo është e nivelit rajonal, pra në kompetencë të Ministrisë së Transportit dhe Post-Telekomunikacionit.

Për çdo vjet kanë kërkuar nga kjo ministri që të ndërtohet rruga, por MTPT-ja në kohën e Qeverisë së Agim Çekut,  e ka ndërtuar vetëm një pjesë të saj, prej fshatit Opterushë të Rahovecit deri në fshatin Studençan, kurse pjesa e rrugës Studençan – Therandë, ka mbetur e  shkatërruar dhe pothuaj e pakalueshme me automjete transporti. Gjatë fushatës të zgjedhjeve të vitit të kaluar qytetarëve të fshatrave të kësaj zone përfaqësuesit e subjekteve politike në nivel lokal,  por edhe zyrtarët më të lartë të Qeverisë së Kosovës, u patën dhënë premtime se rruga Therandë-Studençan do të jetë ndër prioritet e punës së tyre dhe do të ndërtohet sa më parë. Por, si duket, premtimet e fushatës parazgjedhore mbetën vetëm premtime boshe.

Drejtori i Drejtorisë për Shërbime Publike, Muhamet Bajraktari, tha se” rruga Reshtan- Studençan që e lidh komunën tonë me dy komunat fqinje, Mamushën me Rahovecin, ka qenë e planifikuar të ndërtohet që moti, sepse është e një rëndësie edhe strategjike. Ministria e Transportit dhe Post-Telekomit me një shkresë e  ka njoftuar komunën se këtë vit do të investojë vetëm në ndërtimin e rrugës Sopi-Mushtisht, që ka filluar të ndërtohet në muajin nëntor të vitit të kaluar, gjatë fushatës zgjedhore, kurse rruga Therandë-Studençan, nuk ka hyrë në prioritetin e këtij viti. 
/Kosova Sot/Rr. REXHAJ

Publiko kete artikull: