Tokat e bukës, djerrina

Komuna e Therandës ka rreth 39.099 hektarë sipërfaqe të përgjithshme tokësore, prej tyre  12.666 hektarë janë tokë e punueshme pjellore. Me lartësinë mesatare mbidetare rreth  455 metra, në të cilën mbizotëron klima kontinentale me ndikim edhe mesdhetar, komuna ka kushte të përshtatshme klimatike që e favorizojnë këtë rajon për kultivimin e të gjitha kulturave bujqësore. Pas luftës, tokat e bukës kanë pësuar degradim dhe janë shndërruar në djerrina. Sipas të dhënave të Drejtorisë për Bujqësi dhe Zhvillim Rural, aktualisht punohet vetëm rreth 50 për qind  e tokës së punueshme bujqësore, kurse pjesa tjetër është djerrinë ose është shndërruar në kullota të egra.

Mungojnë stimulimet për fermerët dhe bujqit
Bashkëpunëtori profesional në Drejtorinë për Bujqësi, Shaqir Kryeziu, agronom, thotë: "Pothuaj dhjetë vjet pas luftës, bujqve nuk iu është ofruar kurrfarë ndihme materiale e stimuluese. Ata janë lënë në mëshirën e kohës dhe pa kurrfarë mbrojtjeje të prodhimeve bujqësore të tyre. Në këto kushte të rënda për bujqësinë, fermerët nuk po shohin perspektivë e as leverdinë ekonomike  për  t'u marrë me bujqësi dhe, si pasojë e kësaj, tokat kanë mbetur të papunuara. Nga MBZHR-ja, stimulimet për bujqit kanë filluar vitin e kaluar dhe vetëm për ata që kanë mbjellë mbi dy hektarë, duke përfituar nga 90 euro për një hektar të mbjellë me grurë, ndërsa blegtorët me nga  50 euro për kokë të gjedhit dhe nga 10 euro për kafshë të imëta.

Shtohet numri i serrave të perimeve
Vjeshtën që shkoi, me grurë dhe kultura të tjera vjeshtore janë mbjellë mbi 3000 hektarë, kurse, sipas të dhënave, këtë vit me kultura të pranverës do të mbillen gjithsej 2058 hektarë, prej tyre 1225 hektarë me misër, 120 me tërshërë, 3 me thekër, 20 me elb, 130 me patate, 8 me bimë foragjere,  5 me fasule, 3 me bimë industriale dhe 467 hektarë me perime", tha Kryeziu dhe shtoi se nga këto të dhëna shihet se në komunën e Therandës punohet vetëm gjysma e tokës pjellore, kurse 50 për qind e saj po mbetet djerrinë. Kohëve të fundit, fermerët e komunës së Therandës kanë filluar  me kultivimin e perimeve, specave, domates, trangujve në serra të mbyllura. Mënyra e kultivimit të perimeve në serra të mbyllura ka filluar të tregohet shumë e suksesshme, me leverdi ekonomike dhe fitimprurëse. Me prodhimin e perimeve në serra me të madhe janë duke u marrë kryesisht fermerët e fshatit Nepërbisht. Kultivimi i perimeve në serra ka filluar nga disa fermerë të fshatrave të tjerë të komunës së Therandës", tha ing. Shaqir Kryeziu. Drejtori i Drejtorisë për Bujqësi, Zhvillim dhe Planifikim, Bedri Berisha, tha: "Bujqësia është në gjendje të vështirë. Qeveria e re e Komunës ka planin konkret për t`i stimuluar fermerët e suksesshëm. Do të ndihmohen katër lëmenj të bujqësisë: kultivimi i hardhisë së rrushit, vreshtaria, prodhimi i perimeve, stimulimi i fermerëve për mbajtjen lopëve qumështore dhe atyre për shtimin e mëzetërve për majmëri për therje. Jemi duke i shikuar mundësitë që fermerëve t'u sigurohen kredi me kushte të volitshme, ndërsa kamatat t'ua paguajë Komuna", tha Berisha.
/Kosova Sot/Rr. REXHAJ

Publiko kete artikull: