Për tatëpjetën, investohen mbi 600 mijë euro

Në pjesën  e rrugës  magjistrale Duhël - Therandë, kryesisht  në tatëpjetën  prej objektit të vreshtarisë deri tek stacioni i policisë në hyrje të Therandës, automjetet e rënda transportuese  kanë shkaktuar një sërë aksidentesh të rënda komunikacioni, duke ua marrë jetën këmbësorëve të pafajshëm.  Vetëm pas  luftës, në këtë aks rrugor kanë ndodhur tri aksidente të rënda me fatalitet për jetën e disa persona dhe janë shkaktuar dëme të mëdha materiale në pasurinë e qytetarëve përreth rrugës  "Brigada 123". Ndër projektet  e para që do t`i jetësojë pushteti i ri lokal në këtë komunë është, pikërisht, pjesa e rrugës kryesore për të cilën do të investohen mbi 600 mijë euro. Kryetari i komunës, Blerim Kuçi, tha se "Jetësimi i këtij projekti kapital nuk përkon vetëm  me përmirësimin e infrastrukturës rrugore në komunën tonë, por qëllimi  parësor është evitimi i rrezikut  shumë të madh që deri më tani ka marrë jetën e shumë njerëzve të pafajshëm të Therandës. Rruga  nacionale Prishtinë- Prizren që kalon nëpërmes të qytetit të Therandës  është tejet e ngarkuar dhe paraqet rrezik të përhershëm për qytetarët, ndërsa realizmi i këtij projekti ka të bëjë me evitimin  e rrezikshmërisë nga automjetet e rënda transportuese, me çka krijohet siguri e lartë për jetën dhe pasuritë e qytetarëve.

Investim i përbashkët
Komuna, e përkrahur nga Ministria e Administrimit të Pushtetit Lokal, shumë shpejt do të fillojë me ndërtimin e  pjesës së rrugës " Brigada 123" , tha Kuçi dhe shtoi se për realizimin e këtij projekti,  MAPL-ja do të investojë 200 mijë euro, ndërsa komuna ka darë 50 mijë euro mjete nga buxheti i vet, por për realizimin në tërësi të projektit kemi edhe një fond shtesë prej 380 mijë euro.

"Xhepi" mundësi alternative
Në tatëpjetën e rrugës "Brigada 123 ", prej stacionit të policisë e deri tek pompa e benzinës "Flamuri i Petrol", në dalje të qytetit, në drejtim të Prishtinës, këtë rrugë do ta ndërtojmë me katër krosi, kurse prej pompës së benzinës deri te rruga e fshatit  Sllapuzhan, do të ndërtohet edhe një trase shtesë, në të cilën do të qarkullojnë vetëm automjetet e rënda. Kjo trase do ta ketë të ashtuquajturin "xhep"  mundësi për dalje nga rruga në raste të rreziqeve eventuale. Do t`u krijohen kushte shoferëve të automjeteve me  pesha të rënda në raste të paraqitjes së defekteve, me mundësi reale që t`u shmangen aksidenteve fatale, siç ka ndodhur në të kaluarën. Nuk duhet llogaritur në koston e projektit, sepse jeta e njerëzve është shumë më e shtrenjtë dhe e pakompensueshme", tha kryetari Kuçi. Nismën e pushtetit të ri lokal për ta jetësuar këtë projekt e kanë përshëndetur qytetarët e Therandës. Halit Berisha tha se tatëpjeta e rrugës prej objektit të vreshtarisë deri tek stacioni i autobusëve, aktualisht është rruga më e rrezikshme në Kosovë. Për as një çast nuk jemi të sigurt, si në kohën e ish- sistemit komunist, por edhe pas luftës. Në vitin 2002, një kamion ishte përplasur në stacionin e autobusëve dhe pati bërë kërdi: një i vdekur e shumë lënduar. Para dy viteve, një kamion ka mbytur katër persona dhe kishte lënduar shumë të tjerë. Projekti ka qenë domosdoshmëri e kahmotshme, është shprehur kryetari i komunës - Kuçi.
/Kosova Sot/Rr. REXHAJ

Publiko kete artikull: